Se inte 'na nêutte de lùnn-a
pìnn-a, da açéndise o çê,
quànde i schêuggi àn o câdo
de l'ùrtimo ràggio de sô,
un bóffo legêro d'æxîa
o te pìcca a-a giöxîa...
àrvi Maria, àrvi Maria, che són mi.

Se 'na matìn de boràsca,
quànde l'é néigro in sciô mâ
e pâ che a vitta co-o sô
a no l'àgge ciù coæ de tornâ,
o roscigneu a sò cansón
o a tiêse insémme a 'n magón...
àrvi Maria, àrvi Maria, che són mi.

Se a séia do lóngo libéccio
ch'o pòrta cavàlli con lê,
che côran in scê créste do vénto
e adrìsan i sòcoli in çê,
ti sénti angosciôzo into sproìn
o fréido crîo de l'öchìn...
àrvi Maria, àrvi Maria, che són mi.

Se un mezogiórno qualónque
de 'n giórno ch'o n'eu mâi finî,
quànde sucêde de tùtto
e tùtto dêve vegnî,
ti sénti da-e Vìgne sunâ
una canpànn-a stonâ...
àrvi Maria, àrvi Maria, che són mi.