Dòrmi dòrmi popón de péssa
che a màmma a l'é anæta a méssa,
o papà o l'é in mêzo a-o mâ,
ti da grànde no stâghe a anâ.

Fànni o brâo, me dîvan, tò poæ
o pìggia di mòuxi into panê
o pìggia do mâ de póppa e de spónda
e pöi tùtte e mósse ch'o ne racónta.

De quélla vòtta che ina balénn-a
a l'à isòu o vapôre in sciâ schénn-a
de quélla vòtta che 'n pesciocàn
a-o timonê o gh'à arancòu 'na màn
de quélla néutte che gh’êa de ónde
ch'êan ciù èrte do nòstro mónte.

Òu savéi che i mainæ
làscian chi fìggi e mogê
pöi quànde vêgnan pòrtan a cà
sæa profùmmi òudô de sâ;
stàn quàrche giórno e repìgian o mâ:
són sôlo boìn a fâse aspêtâ.

Dòrmi dòrmi popón de péssa
che a màmma a t'acaréssa
o papà o l'é in mêzo a-o mâ:
o l'é bón sôlo a fâse aspêtâ.

Ti savésci quànte ò aspêtòu
e maledîo quéllo lòu
quànte vòtte gh'ò dîto a-o mâ
che da-o barcón o mò-u càcce in pö in cà.
Ti savésci quànte ò aspêtòu
e maledîo quéllo lòu
quànte vòtte pe no gh'amiâ
ò arembòu a giöxîa in sciô mâ

Finalino
Dòrmi dòrmi popón de péssa
che a màmma a t'acaréssa,
o papà o fa o mainâ:
ti da grànde no stâlo a fâ.