Ricòrdo i Natâli de quànd'êa picìn
rivéddo o prezépio co-o beu e l'azenìn
in sâla gh'êa 'n èrbo co-a néive-e-e candéie
e apéizo gh'êa l'órso, a tronbétta e doê méie
meténdome in létto mæ màmma cianìn
a dîva: "Sciù dòrmi, che vêgne o Banbìn.
Nìnn-a nànn-a mæ ninìn".

Dìn dòn dàn, e canpànn-e sentîva sunâ
co-o Banbìn ch'o chinâva da-e stélle
m'asunâva d'andâme a demoâ.
Dìn dòn dàn, quànte angêti vedéiva xoâ
che portávan demôe e pandósci
pe-i fìggi di pôvei che no àn da mangiâ.

Natâle o metéiva l'axìllo into cheu
gh'êa sénpre 'n regàllo pe tùtti i figeu
fra tórte e sâsìsse, capoìn e botìgge
in câza da nònna éimo in çìnque famìgge
co-i bàrbi e chi e làlle, e-e nésse e i coxìn
e niâtri figeu s'arenbâvimo òu poìn,
pe scrocâghe cicolatìn.

Dìn dòn dàn, e canpànn-e sentîva sunâ
co-o Banbìn ch'o chinâva da-e stélle
m'asunâva d'andâme a demoâ.
Dìn dòn dàn, quànte angêti vedéiva xoâ
che portávan demôe e pandósci
pe-i fìggi di pôvei che no àn da mangiâ.

Finalino
Dìn dòn, dìn dàn