Ricòrdo da figeu i caróggi rîe
e o carlevâ in matìn inte Stràdde Nêuve
o pòrto rìcco diféizo da-e garîe
e 'n gràn mercantezâ into dâ e into schêuve

Pöi e lâgrime vegnî zu da-e montæ
e i dispiaxéi diventâ o mâ do móndo
e i teu malànni tùtti vegnî mæ
e són corîo pe ciànze e moî con ti...

Cantàndo mi pòrto a sperànsa
cantàndo mi pòrto l'amô
ma pe ti, tæra e prîa da mæ vìtta,
e cansoìn pàrlan sôlo de dô.

Cös’a fa a mæ chitâra se i tò fìggi,
s'amîan mâ e no se séntan fræ
capìscian sôlo quéllo che ti pìggi
e no s'acòrzan che ghe mêue a moæ.

Làscian o mâ brigànti saracìn
e i mónti sénsa lòu divéntan zèrbo
scâvi in scê câze e cómme di asascìn
capìscian sôlo o ciòcco di dinæ.

Cantàndo mi pòrto a sperànsa
cantàndo mi pòrto l'amô
ma pe ti, tæra e prîa da mæ vìtta,
e cansoìn pàrlan sôlo de dô.

Cös'a fa a mæ chitâra se chi sénte
magâri o sprémme quàttro stìsse a-o vénto
ma drénto o rîe perché a l'é gràmma génte
e inta rovìnn-a o spàrte e-o l'é conténto.

Te làscio Zêna ti che t'æ o mæ cheu
speràndo che domàn ritórne giórno
speràndo che domàn quésti figeu
fàsan felîçe ti e o mæ... ritórno

Cantàndo mi pòrto a sperànsa
cantàndo mi pòrto l'amô
ma pe ti, tæra e prîa da mæ vìtta,
e cansoìn pàrlan sôlo de dô.