Dôve són tùtti i strazétti
ch'àivo fæto bardasciàmme...
(quàttro fîghe, do pàn pöso
con doê fétte de salàmme)
Dôve són tùtti-i mæ fiâgni
da scciancâghe 'n ràppo d'ûga?
Dôve són e crêuze e i òrti
co-e tomâte e co-a leitûga?

Bocadâze, t'ê restâ
sôlo ti cómme 'na vòtta
ghe vegniö pe fâ ribòtta
li da l'òste, in fàccia a-o mâ.
No cangiâ... T'ê tùtta ti
co-a teu spiâgia e l'èrba còcca,
con o mòuxo ch'o riciòcca
e ch'o sbàtte sénpre li.

Se gh'andâva co-a pivèlla
pe-i sentê fæti pe-e crâve.
Derê a-e pòrte de vilétte
gh'êa 'n recànto pe abrasâve.
Da-a nicétta a madonìnn-a
capitâva sénpre o câxo
ch'a finzésse de no védde
quàrche cóbia dâse un bâxo.

Bocadâze, t'ê restâ
sôlo ti cómme 'na vòtta
ghe vegniö pe fâ ribòtta
pe cantâ o mæ vêgio Arbâ.
No cangiâ... T'ê tùtta ti
co-e giöxîe e-e àrve scûe...
Cêuve ò néiva ò che derûe
ti restiæ sénpre coscî!