Da un a vìnti ògni nùmero o gh'à o seu nómme.

Da vìnti a çénto i nùmeri compòsti si scrîvan coscì:

• quànde l'unitæ a l'é un òpûre éutto a vocâle finâle da dêxénn-a a s'elìdde: trént'un [treN"tyN], çinquànt'eutto [sinkwaN"t2ttu];
• inti âtri câxi:
  • se o nùmero o l'incoménsa pe vìnti l'unitæ a se gh'atàcca e bàsta: vìnti sêi [viNti"se:i];
  • pe-e âtre dêxénn-e l'unitæ a s'unìsce co-a congionçión e ch'a pròvoca l'elixón da vocâle finâle da dêxénn-a: sciusciànt'e tréi [SySaNte"trej] (eròu sciusciànta tréi), quarànt'e sètte [kwaraNte"sEtte] (eròu quarànta sètte).

Da çénto a mìlle vâ ste régole chi:

• E çentanæa se scrîvan cómme se scrîve e paròlle conpòste. Atençión a sèteçénto ch'o l'à a prìmma e avèrta;
• se a dêxénn-a a l'é òtànta se gh'à l'elixón: duxént'òtant'e doî [dyZeNtOtaNte"dwi:].

Da mìlle in sciù s'azónze, sénsa cangiâ nìnte, e migiæa, i milioìn, i miliàrdi ò quéllo che gh'é.

Notta 1. I nùmeri pêuan êse scrîti ànche cómme 'n'ùnica paròlla; inte quésto câxo vâ e régole de paròlle conpòste: mìlleseiçéntosetànteçìnque ["mille sei"seNtu setante"siNkwe], tréimìllasèteçéntòtantùn ["trej "milla sEte"seNt OtaN"tyN].

Notta 2. Quànde se dîxe i ànni a vocâle do nùmero a se elìdde fêua che quànde o nùmero o finìsce pe un, doî (ò dôe), tréi (ò træ), sêi: òtantequàttr'ànni [Otanteqwatr "anni], çentomìll'ànni [seNtumil "anni], vintisêi ànni [viNtise:jj"anni].

Notta 3. A mæxima cösa a sucêde ànche quànde se dîxe e ôe: ùnz'ôe [yNz "u:e], træ ôe [trE: "u:e].