14-7-2000
Cómme se poéiva lêze in fóndo da prìmma pàgina, o quatòrze de lùggio do doî mìlla o Conrad Montpetit o l'à mìsso in sciâ Ræ in scîto tûtto scrîto in zenéize ch'o l'êa a l'indirìsso www.geocities.com/ziardua/zeneize.html e che òua o no gh'é ciù dæto che Geocities o l'à seròu o vintisêi d'òtôbre do doî mìlla nêuve.

20-10-2000
O vìnti d'òtôbre do mæximo ànno, o Conrad o mànda 'na e-mail a 'n pö de persónn-e pe invitâle a parteçipâ a-o grùppo de discusción zenéize in sciâ léngoa zenéize, un grùppo ch'o l'àiva inandiòu quàrche giórno prìmma, o dîsètte d'òtôbre. Inte quésto mòddo o Conrad o l’à mìsso sciù un scistêma dóve pe çìnque ò sêi ànni ciù de çénto çinquànta persónn-e àn parlòu liberaménte da nòstra léngoa zenéize e de seu variànti.

9-2-2002
O nêuve de frevâ do doî mìlla doî, o Conrad o mànda 'na e-mail a-a lìsta zenéize (coscì o vegnîva ciamòu o grùppo da-i parteçipànti) ch'a l’incoménsa coscì: «dòppo de setemànn-e de ànsce e de afànni, són finalménte ariêscîo a finî o stramûo do scîto a l'adrèsso www.zeneize.net».
Écco cómme e quànde o l'é sciortîo fêua l'indirìsso do scîto.

14-3-2004
O quatòrze de màrzo do doî mìlla quàttro o Conrad o manda 'na e-mail a çìnque persónn-e dôv'o dîxe che lê in scê Internétte o ghe va sénpre ciù de ræo; pe quésto o-e nòmina "fondatoî" do grùppo zenéize. Insómma, un prìmmo segnâle ch'o se veu retiâ.
Pe coixitæ o Conrad o scrîve l'ùrtimo mesàggio a-a lìsta o vìnti nêuve de màrzo do doî mìlla quàttro

15-10-2004
O chinze d’òtôbre do doî mìlla quàttro, sensa dâ nisciùn'âtra spiegaçión, o Conrad o manda 'n'ùrtima e-mail a 'n pö de persónn-e pe dîghe che e conescióin verso o scîto www.zeneize.net no aviéivan ciù fonçionòu.
O domìnio zeneize.net o l’é stæto fæto scàzze.

2007 - Nàsce l'idêa de l'Académia
A lìsta inandiâ da-o Conrad Montpetit a fonçiónn-a pe çìnque ò sêi ànni pöi, ciàn cianìn, a s'asmòrta. A quéllo pónto 'na dêxénn-a de parteçipànti a-a lìsta (che se conosciàn sôlo pe e-mail) a decìdde de no pèrde l'esperiénsa fæta co-e discuscioìn inta lìsta e de métte in sce 'n scîto Internétte e seu concluxoìn. Decìdan coscì de recuperâ l'antîgo nómme de l'Académia Ligùstica do Brénno, de mantegnî l'anonimâto e de êse giudicæ no pe-e persónn-e che són, ma pe quéllo che gh'é scrîto into scîto ch'o saiâ inandiòu. O scîto o permetiâ de dî a pròpia òpinión inte quæxi tùtte e pàgine che no vêgniàn mâi scancelæ.

23-4-2008 - Fèsta de Sàn Zòrzo
O giórno da fèsta de Sàn Zòrzo, o vìnti tréi d'arvî do doî mìlla éutto, a l'indirìsso dêuviòu da-o Conrad pe-o seu scîto gh'é stæto mìsso o scîto de l'Académia Ligùstica do Brénno.

[ in çimma da pàgina ]

Cöse gh'é restòu do travàggio do Conrad ?

O förum zenéize, dîto ascì o grùppo ò a lìsta, o gh'é ancón e o se peu atrovâ sciacàndo chi. Però o l'à incominsòu a no fonçionâ ciù za into doî mìlla sêi; inte tùtto o doî mìlla sètte i mesàggi són stæti sôlo trenteçìnque.
Aregodémmo che chi a l'Académia l'é poscìbile comentâ quæxi tùtte e pàgine.

Cómme l'é za stæto dîto, o scîto do Conrad, o no l'exìste ciù dæto che Geocities o l'à seròu o vintisêi d'òtôbre do doî mìlla nêuve.
Infìn gh'é o Poulìn ch'o l'é coscì dispiâxûo che o vêgio scîto o no gh'é ciù, ch'o l'à tegnûo 'na còpia da seu pàgina prinçipâ (percórso: prima pagina > collegamenti > SITI IN GENOVESE - ZENEIZE).

[ in çimma da pàgina ]

Còpia do scîto do Conrad

Dæto chò-u scîto do Conrad o no l'exìste ciù e dæto che l'Académia Ligùstica do Brénno a l'é stæta mìssa dôve gh'êa o scîto do Conrad, s'é pensòu bén d'òspitâ 'na còpia pægia a l'originâle. Se conséggia a tùtti de cangiâ e pròpie conescioìn con sta chi:
http://www.zeneize.net/ziardua/zeneize.html
Pe tùtte e conescioìn, ànche inte pàgine intèrne, bàsta scangiâ sôlo
www.geocities.com    con    www.zeneize.net