Ma quante son i politichi in Italia? Sta fraze chi l’ò lezua pe caxo in sce Internette inte ’na pagina dove chi l’à scrita o s’é demoòu a contali: 630 deputæ, 315 senatoî, 1.117 consegê regionali, e pöi i comuin, i municippi, e chi sa quante atre diavolaie se saian inventæ pe marmelane de palache ch’en e nòstre. Do resto l’é ciæo che i nòstri dinæ van a finî inte stacche de chi solo o Segnô òu sa! Eh sci. A cösa a dev’ese pe fòrsa coscì dæto che no riescian a diminoî e tasce manco de ’n citto comme a dî ch’an bezeugno de tutto quello che ne piggian pe mandâ avanti a baracca (a seu baracca, veuggio dî). Però, e saiâ perché con l’etæ vegno senpre ciù aluòu, devo confesâ che no me pa sbaliòu che anche ’n politico o segge pagòu pò-u lòu ch’o fa. Quello che l’é insoportabile o l’é che quande arivan a asetase in sciô careghin, se scòrdan de quello ch’aivan promisso pe fase eleze e incomensan a fâ solo i seu interesci! E pe destacali da quello careghin ghe veu ’n giamin do diao e e ciù vòtte no se ghe riesce. E diggo de ciù. De sti tempi, che se vedde ratelle a reo inte tutte e parte politiche, l’é ciæo che tutto questo o sucede no pe fâ stâ ben o pòpolo, ma solo perché loiatri, i politichi, senpre de ciù veuan aseguase a “rieleçion” e aloa çercan d’anâ ò con un ò con l’atro a segonda de chi ghe da ciù garançie. ’Na vergheugna! Però, a pensaghe ben, in pö de corpa ghe l’emmo anche niatri eletoî che no semmo boin a mandali a spigoâ co-o voto magara çernendo diferentemente da comme emmo de longo votòu. E coscì, gh’é tanti che, comme mi, s’ancontentan de mogognâ, de lamentase e, fòscia, son finn-a feliçi de pigialo de longo inte ’n pê!

O Crescentin

Pigiòu da-o Gazzettino Sampierdarenese Anno XLIV - N. 1, 31 de zenâ do 2015