“L’aze o camalla o vin e o beive l’ægoa”. Miæ comm’o l’é scemmo! Niatri se credemmo ciù asperti ma, in mæ veitæ, semmo ciù scemmi de l’aze pe coscì. Defæti inte sti urtimi giorni ægoa n’emmo visto e colòu a rêo: atro che vin! E quande gh’ea da camalâ emmo camalòu bratta e rumenta.

Rumenta! Ciamâ rumenta tutto quello che l’ægoa e a bratta an destruto a l’é ’n’òfeiza pe chi quella röba o l’à acatâ sann-a, tiando feua palanche bonn-e, pensando de poeighe goâgnâ quarcösa pe tiâ avanti. Inte quarche oa, tutte quelle cöse che vaivan se son perse, son vegnue rumenta. E ghe n’é mai tanta de rumenta che o Comun o no sa manco ciù dove metila. Tonei e tonei de cöse, che ean o futuro de centanæa de famigge, òua son vegnue rumenta: “inmondo amàlgama de conponenti i ciù eteròcliti e diferenti” (Baçigalô: O canto da rumenta).

Torna! Torna ’n’atra aluvion! Torna gente ch’a perde tutto, turna lutti e desmui! Ma a cösa pezo, perché a-o pezo no gh’é mai fin, a l’é che se ti ricostruisci quello che t’æ perso, se ti te metti torna a ’ncomensâ da-o ninte, nisciun te peu aseguâ che tra ’n anno, tra ’n meize ò tra dexe giorni no sucede torna pægio. Ma dov’o l’é o sæximo de quelli che ne governan, de quelli che l’é o seu dovei fâ che ste cöse chi no sucedan ciù? Comme poemo sperâ de tiâ sciù a testa se aomenta e tasce e scenta a seguessa?

Seguo! I zeneixi son ’na razza fòrte, no ghe mòllan, se dan da fâ e se vedde: a çitæ a l’é ògni giorno ciù netta. Seguo! Son òrgoliozo mi ascì d’ese zeneize. Ma ancheu gh’ò o cheu inte spinn-e e son coscì avilio, coscì aragiòu, coscì mocco che no gh’ò manco ciù coæ de mogognâ.

O Crescentin

Pigiòu da-o Gazzettino Sampierdarenese Anno XLIII - N. 8, 31 d'òtôbre do 2014