Dòppo o Sciô Reginn-a (Martin Piaggio) i lunai son vegnui ’na tradiçion pe Zena. Tanti aotoî àn continoòu a scrivili e ancon do 1932 l’é sciortio o primmo numero de ’n neuvo lunaio conpilòu da “Ore Leo & Soci”.

O tòcco brilante che prezento chi sotta o fa parte de ’n tòcco ciù longo intitolòu “Pe forsa! – Monologo” e o l’é stæto publicòu a-e pagine 46 e 47 do “Lunaio Zeneize pe-o 1934 – XII”. Concluddo con trei comenti:

1. avei a çigaa in sciâ canna veu dî avei l’axillo, ese invexendòu;
2. o fa o pan gratòu perché, dòppo esighe cheito drento, o s’é fæto frizze spozandose;
3. a paròlla “bâsigâ” (chi scrita bâsegâ) a se tradue “bazzicare” e, con questo scignificato, a l’é registrâ da-o Cazassa into seu vocabolaio do 1876 sott’a-a voxe bâsigâse.

Franco Bampi

Chi son? Mah! Mi son mi, e me pâ che baste. Pe-o momento, e in scena, son ’n artista, ma feua do palcoscenico no son atro ciù che Baciccia Spinn-a, in pövòu òmmo sensa famiggia ò, a megio dî, con tanta famiggia che o no sa manco ciù lê cöse o raprezenta.

Vedemmo ’n pö se ghe foise quarchedun ch’o m’agiutesse a desbrogiâ a mæ sitoaçion. Mæ poæ o l’à ’n gran magazin d’abiti fæti... into caroggio da meza Galea, o l’é ’n bel’òmmo in ganba, ma mentre o l’é mæ poæ o l’é ascì mæ figgio; mæ moæ a l’é mæ seuxoa, e mi son mæ nònno! No stæ a rie che ve preuvo se staiei ben atenti.

Me son maiòu che aveivo trant’anni co-ina vidoa de quaranta ch’a l’aveiva ’na figgia de dixeutto. O bacan, che, comme v’ò dito, o l’à ancon a çigaa in sciâ canna, a fòrsa de bâsegâ pe-a caza o s’inamoa de mæ figiastra e o finisce pe cazighe drento. O fa o pan gratòu e ti saluto! Pe consegoensa mæ poæ o diventa mæ zenòu e mæ figiastra mæ mamà, esendo sò mogê. Intanto a mæ dònna a me regalla in masciòtto, ch’o l’é o cugnòu de mæ poæ, o diventa mæ barba, e nevo de mæ poæ perché o l’é figgio de sò figgia. Ei capio?...

A mogê de mæ poæ, invidioza come ghe n’é tante, a fabrica lê ascì in bello banbòccio ch’o l’é mæ fræ e mæ nevo, perché o l’é o figgio de mæ poæ e de mæ figgia. Mæ mogê a diventa mæ nònna, perché a l’é a moæ de mæ moæ, mi son sò maio e sò nevo, perché figgio de sò figgia, e scicomme o maio da nònna de qualonque individoo o l’é nònno lê ascì, coscì mi son diventòu mæ nònno!

A l’é ciæa, no l’é veo? Chi mò-u dixe òua chi son?

Per mi continoo a ese Baciccia Spinn-a, e basta!

Pigiòu da-o Gazzettino Sampierdarenese Anno XLIII - N. 7, 30 de seténbre do 2014