Me pâ de no avei mai parlòu de San Teodöu. Devo esimene ascordòu. Eh za, perché no l’é che li e cöse vadan megio che chi! Pigemose ’n pö a question da palestra de stradda Digion. Li, dòppo o disastro do cròllo do monte (l’ea o 21 de marso do 1968) ch’o l’à fæto 19 mòrti, pe ’n pö gh’é restòu di magheu acaiæ un in sce l’atro. Pöi l’é stæto fæto in netezzo e quarchedun o gh’à avuo l’idea de faghe di giardinetti. Coscì li, inta doloroza feria do cròllo, gh’ea luxe, erboi, verde e ’n spaçio pe fâ demoâ i figeu. Ma te paiva che ’na cösa ch’a fonçionn-a a poeiva continoâ? Òua gh’é ’na “palestra”, in cubbo sensa dignitæ architetònica ch’o serve solo a fâ scuo; ma a cösa ciù bella a l’é che a parete verso e caze de stradda Digion a l’é fæta de... lamma! Quande ghe picca o sô no se peu tegnî i euggi averti pe l’inbatto! Conplimenti!

Ma anche chi a San Pê d’Ænn-a ghe ne da dî. Quande an misso in ordine i pòrteghi de stradda Cantore, an anche scistemou o marciapê de feua con de priette giane, magara in pö tròppo ciæe... Va ben, ciantemola de mogognâ: no stavan manco mâ. Anæ a vedile òua: da tantiscime parte e priette no gh’en ciù e coscì o marciapê o l’é vegnuo tutto bricchi e fòsci e o mette angoscia!

L’é quarche giorno che an asfaltòu stradda Malfettani. Ma no l’an asfaltâ tutta: solo trei quarti. Sci, perché se anæ a vedde gh’é ’n tòcco de stradda dove posteggia e machine vixin a-o marciapê ch’o no l’é stæto asfaltòu. Magara fa ’n travaggio ben fæto o costava tròppo ò ghe voeiva tròppo sæximo!

Ma a ciù bella no ve l’ò ancon dita. In amigo ò l’à fæto in piâxei a ’n bitegâ, sperando de fâ ’na cösa gradîa. Miæ tutto de badda! O sei cös’o se sentio dî, pe ringraçiamento? «Ma niatri voeivimo de ciù!» Dimelo ’n pö viatri comme se fa a no mogognâ!

O Crescentin

Pigiòu da-o Gazzettino Sampierdarenese Anno XLIII - N. 7, 30 de seténbre do 2014