No sò se ese contento ò se devo preocupame ancon de ciù! Da vegio mogognon, no l’é che me fîo goæi quande sento che l’Eoröpa a ghe mette o becco: de sòlito sucede che e cöse van pezo... Mah! Però o problema o gh’é e o se ciamma: scadensa do mangiâ. M’àn vosciuo dî che se caccia via in muggio de mangiâ pe via da dæta de scadensa: inte ’n anno e gente eoropee cacian via 89 tonei de mangiâ e ògni famiggia a spende 515 eori a l’anno p’acatâ da röba che pöi a finiâ inta rumenta. Pe ’n zeneize comme mi, son cöse che me fan alighî e bele! Seguo, o problema da conservaçion do mangiâ o gh’é e o gh’é senpre stæto. Se meteiva a röba sotta sâ, in adobbo, òpure a se fava secâ (magara p’avei cöse boniscime comme o stochefiscio); de spesso i antighi mangiavan anche cöse pasæ, che e condivan con sarse da-o gusto fòrte pe no sentîghe o grammo. Quande en riêscii a fâ a pasta secca, diversamente d’ancheu, aloa a costava de ciù de quella fresca, che tutte e dònne poeivan fa, pròpio perché a duava de ciù. In cangio, niatri moderni se semmo inventæ a dæta de scadensa p’acòrsize che, sciben ch’a le utile, però a fa stragiâ in pö tròppo mangiâ. E coscì pròpio in sti giorni chi se pensa de eliminâ a dæta de scadensa da-o mangiâ ch’o no va a mâ e de lasciala inte quelle cöse che se goastan fito. L’é ascì nasciuo in America (dove se no?) in movimento che, tra e atre cöse, o veu recuperâ o mangiâ scheito. O se ciamma: freegan: insomma, comme dixe o nomme, o saiâ ’n’atra... fregatûa!

O Crescentin

Pigiòu da-o Gazzettino Sampierdarenese Anno XLIII - N. 5, 31 de màzzo do 2014