Académia Ligùstica do Brénno

parlémmo a nòstra léngoa

Académia Ligùstica do Brénno
 
Intrâ > Mediatêca > Tèsti > L’educaçion

L’educaçion

[ Tèsti ]

 
 

[ Dìnni a teu ]

Mediatêca

Màppa do scîto

Dôv'én i coménti

Covertìnn-a

 

’Na carasâ d’anni fa, quand’ea figeu, me l’aregòrdo comme se foise vei, a niatri bagarilli i nostri genitori ne mostravan l’educaçion. Ne divan cöse se poeiva fâ, cöse se doveiva fâ e cöse no bezugnava fâ. E chi sghindava o pigiava quarche lerfon, magara da-o vexin de caza, perché tutti intervegnivan pe fâ in moddo che i figeu se conportesan con educaçion. No se poeiva fâ tutto quello che a niatri gardetti ne gustava fâ perché se doveiva rispetâ i atri, conportase ben, ese educæ. Beh, l’é ciæo che quarche birichinata da batoxi a se fava, emo figeu! Ma no ean cöse gravi e, sorviatutto, a niatri l’ea ciæo ch’a l’ea ’na cösa mâ fæta. Pe questo, quande in sciô scito do Gazetin ò visto a fotografia ch’o gh’à misso o sciô Bampi, m’é vegnuo da pensâ. A l’é ’na foto de stradda Alfieri dove se vedde ’na machina giana postegiâ a-a reversa, fæto vietòu e sançionòu da-o còdice da stradda. Coscì me vegnuo in cheu tutte quelle vòtte che e moto s’infriccian inte stradde ch’en li ’n gîo in senso vietòu, che no ti sæ mai da che parte amiâ pe poei atraversâ seguo. Ma penso a-i outobi ascì. Quand’ea zoeno se t’intravi da-a parte sbaliâ e gente e o sciafeur te favan chinâ pe fâte montâ da-a parte giusta. Òua, da quande gh’é in pö troppi foresti, in cangio de mostraghe da dove s’intra, quarche sciacælo o l’à pensòu ben de intrâ lê ascì da-a parte sbaliâ: saiva a dî che semmo niatri a perde l’educaçion e no liatri a inparala. Cöse pæge sucedan inti condominni dove gh’é di mâducæ che no te lascian dormî, che cacian röba pe-a stradda e che no son manco boin a destende perché ghe cazze de longo quarche drappo. A mi m’àn mostròu de no caciâ o papê ò a rumenta pe tæra. Ancheu, se Zena a l’é coscì succida, l’é perché senpre ciù gente a s’ascorda che no bezeugna caciâ tutto dove capita.

O Crescentin

Pigiòu da-o Gazzettino Sampierdarenese Anno XLIII - N. 1, 31 de zenâ do 2014

[ in çimma da pàgina ]

Dìnni a teu

Nomiâgio:
Stàggo a:
E-Mail:
O mæ scîto
Internet:
Coménto (no ciù de 1000 caràteri)

   

Nòtta: o coménto o saiâ publicòu, o ciù fîto poscìbile, dòppo ch'o l'é stæto controlòu.

[ in çimma da pàgina ]