Ma, öriæ savei, quelli che ne governan o fan perché ghe l’à ordinòu o mego ò pe cöse? E miæ che no parlo de Romma: la no gh’acapisce ninte nisciun, figuremose mi! Parlo de San Pê d’Ænn-a, de caza nòstra, de chi sotta, in faccia a-o teu pòrtego. Eh za. In pö de anni fa an “riqualificòu” stradda Rolando (ma chi l’é chi l’à avuo st’idea chi... mah!) dove, in cangio de lastre da nòstra antiga tradiçion, gh’an misso di mostri picinetti che se ciamman “sanpietrini”; pöi an pedonalizòu a stradda e l’an abandonâ a-o seu destin. Levòu quande gh’é e biteghe averte, inte atre oe gh’é d’aveighe poia a pasaghe. Paçiensa, diâ ciù de un: no ghe pasiemo... (Sto belicitere de maniman! Mai un zeneize ch’o fasse quarcösa de ciù de ’n mogogno: in pö comme mi...). Ma a cösa a gh’à de consegoense ciù gravi. Intanto quande de martedì e de zeuggia gh’é o mercòu, con stradda Rolando serâ, a circolaçion a l’é ancon ciù inposcibile. Ma a cösa ancon pezo a l’é che tutti quelli che stan tra stradda Monti e stradda san Gioan Bòsco, ciù tutti quelli che stan da-i Landi e in pö de quelli de quöta quaranta, per anâ dove se sæ, a Zena ò pò-u mondo, devan pe fòrsa pasâ da stradda Monti! Sucede coscì che de matin a vegne ’n belo pin de fumme e de scareghi de machine. Côe a rêo, straggio de tenpo, gente ch’a se fa do nervozo; e chi ghe deve vive in stradda Monti, i bitegæ, respîa tanta de quella rumenta da anasene a l’atro mondo. Ma no gh’é nisciun, de quelli che ne comandan, ch’o segge bon a dî: con stradda Rolando emmo sbaliòu, femmo quarche cangiamento e çerchemmo de risòlve o problema? Miæ: bastieiva arvî a-e machine o tòcco tra stradda san Gioan Bòsco e stradda Storace: armeno coscì, chi veu anâ in Ponçeivia no deve pe fòrsa pasâ da stradda Monti; e anche quelli che van verso o Levante gh’avieivan ’n’atra posciblitæ. Stanni a vedde che òua son vegnuo in genio mi ascì!

O Crescentin

Pigiòu da-o Gazzettino Sampierdarenese Anno XLII - N. 10, 20 de dexénbre do 2013