Ve veuggio contâ ’n fæto. Anni fa, quand’ea ciù zoeno e gh’aiva ancon coæ d’anâ in gio pò-u mondo, ea stæto pe travaggio inte ’n’inportante çitæ do meridion. No serve che digghe quæ: diö solo ch’a no l’ea Napoli. Dòppo quarche giorno ch’ea li e che ea anæto in giandon pe conosce a çitæ, a sensaçion che gh’ea quarcösa ch’a no l’anava a s’ea fæta senpre ciù fòrte. A çitæ a l’ea ricca de monumenti, a l’aiva di belli palaççi, e stradde e e ciasse mostravan ’n’antiga belessa, ma gh’ea quarcösa... Coscì me son amiòu in gio con ciù atençion e ò acapio: a çitæ a l’ea succida! Pe tæra inte stradde gh’ea de tutto, ma sorviatutto gh’ea papê e rumenta smenissâ che donde t’amiavi ti ne vedeivi di tochetti. E pöi tutto o l’ea in dizordine: s’ean adreitua aröbæ i færi di coniggi e, pe no lasciâghe o pertuzo, gh’aivan misso de prie da astrego. Aloa ò pensòu che ea davei fortunòu de vive a Zena, dove cöse coscì no se ne saieiva mai viste. Òua sò che m’ea sbaliòu. A Zena d’ancheu a l’é ancon pezo de quella çitæ che no ò mai ascordòu: Zena a l’é succida, co-a rumenta inte ògni recanto, pinn-a de pertuxi che stan li di anni sensa mai ese atapæ. A gente a s’avarda a racheugge i bezeugni di chen, a se ne sbatte l’òrsa a caciâ pe tæra papê, botigette e lamme de bira, cartoin, casce de legno, ante di armaddi... Pövia mæ Zena dove zeneixi e foresti se sentan outorizæ a fa quello che ghe pâ sensa che nisciun ghe digghe ninte! Atri tenpi quelli de ’na Zena netta che l’ea ’n piaxei vivighe! Òua squæxi no me incallo a sciortî e me vergheugno de vedde a mæ çitæ coscì mâ tegnua. Ma quelli che ne devan aministrâ dove vivan? No peuan de longo dî che “manca e palanche”!

O Crescentin

Pigiòu da-o Gazzettino Sampierdarenese Anno XLII - N. 9, 30 de novénbre do 2013