Mah... Miæ, gente, no sò ciù cöse pensâ. Stæme ’n pö a sentî. Quarche giorno fa, gh’aivo çinque menuti liberi e son anæto a leze quacösa in sciô scito do Gazetin. Pâ, pâ, ma mi ascì son “tecnològico” sciben che gh’ò a mæ etæ! Bàcere Baciccia! ’Na bonn-a notiçia: an netezòu i vortin da Scciumæa. L’é ciæo ch’ò subito pensòu che s’a continua coscì, no aviö ciù mogogni da fâ! Ben, ea za preocupòu pe sta cösa chi che screuvo che mercoledì 23 d’òtobre, chi a San Pê d’Ænn-a gh’é a manifestaçion contra o degraddo. Ah! Me son fretòu e moen e ò incomensòu a leze. Atro che Crescentin! Atro che mogognâ pò-u gusto de falo! Chi gh’é porpa d’adentâ pe chi gh’à i denti boin! No gh’é ninte che vadde ben. I ciantê comensan in travaggio e no-o finiscian; bezeugna avei ciù contròlli, specce in sciâ vendita di alcòlici; basta co-e license a sociêtæ do beretin che portan bordello e degraddo e serâ quelle che za gh’en; bezeugna regolamentâ e sale da zeugo (a propòxito, ma cöse l’é sucesso in via Molteni? Li ghe n’é abretio!); ocore che o Municipio o pòsse avei o potere de intervegnî sensa dovei pasâ da-o Comun de Zena. Cöse dî: a realtæ a supera a fantaxia! Però, dæto che son chi a mogognâ con viatri, veuggio azonze ’na cösa mi ascì. E ve domando: ma quanti cineixi gh’é chi a San Pê d’Ænn-a? L’é za da ’n pö che quande vaddo in giandon pe stragiâ ’n pö de tenpo pe-a stradda m’acòrzo de incontrâ de longo di cineixi: primma no l’aivo notòu. Sci, se sa: quande ’na bitega zeneize (ò italiann-a, dipende da chi ghe l’à) a ghe da ’n cianto li, gh’é subito quarche cineize ch’o se ghe mette lê. Ma fin a vei, ean, comme dî, invixibili: se ne stavan inte seu biteghe e se no ti gh’intravi no ti i vedeivi. Òua no: ti l’incontri de spesso pe-a stradda. Ò fòscia son mi, che da vegio, veddo bisce e baggi.

O Crescentin

Pigiòu da-o Gazzettino Sampierdarenese Anno XLII - N. 8, 31 d'òtôbre do 2013