In pö de giorni fa, eo anæto a Zena co-a machina pe fâ de comiscioin. Me saieiva cao pigiâ i mezzi, ma o risparmio o no l’é coscì tanto e e scomoditæ son davei in muggio: i mezzi no pasan mai, a bòrdo l’igene a l’é quella ch’a l’é, te ronsan, ti væ a rischio de fate aröbâ o pòrtafeuggio e a te va de lusso se ti senti parlâ italian. Coscì son anæto inte ’n parcheggio a pagamento, ò giòu pe Zena e verso eutt’oe de seia me son misso in camin verso San Pê d’Ænn-a. No fasso a tenpo a sciortî da-a sorviaelevâ che son za in coa. «Tò-u li! Semmo de setenbre, e ferie son finie e o trafego o no te lascia manco o tenpo de respiâ! – ò pensòu tra de mi – Fortunn-a che son in machina e pòsso sentîme in pö de Marzâri.» Però, amiando ben li davanti a mi, quello o no l’ea in trafego normale: gh’ea træ machine di cantonê e i cantonê ean armeno in sei. «Oh Segnô! Chi l’é sucesso ’n goaio!»
L’ò saciuo o giorno dòppo: in scignoro o l’é stæto amasòu da ’n foresto ch’o l’ea pasòu co-o rosso! Ma, diggo mi, l’é mai poscibile che no s’ariesce a fâ acapî e a fâ rispetâ e nostre regole a chi vegne chi da niatri? A Republica de Zena a l’acetava tutti a doe condiçioin: che poesan mantegnise e che rispetesan e lezze de Zena. Perché l’Italia a no peu fâ pægio? De seguo cianziescimo meno mòrti in scê stradde e pe-a stradda se ghe fise ’na ciù grande atençion a-a seguessa di çitadin che ormai, specce quelli vegi comme mi, gh’an poia a sciortî pe-a stradda, maniman te sucede in goaio comme a quello scignoro ch’o l’é morto pe ninte, perché un o no l’à rispetòu e regole che a niatri, za da figeu, n’an insegnòu a rispetâ.

O Crescentin

Pigiòu da-o Gazzettino Sampierdarenese Anno XLII - N. 7, 30 de seténbre do 2013