Seguo che quande l’ò vista, a dî a veitæ, a me paiva ’n pö strania. Ma, cös’ ti veu, mi no n’ò mai saciuo a memöia manco e mæ e ghe manchieiva ancon che dovesse inparâ anche quelle di atri. Però... gh’ea quarcösa che no me convinçeiva do tutto. Pöi tò-u li ch’ò acapio: a l’ea ’na targa foresta: quella machina li a l’aiva ’na targa foresta. E za perché RO o no veu dî Rovigo (a çitæ veneta), ma o sta pe Romania! Aloa me son amiòu in gio e, perdingolinn-a, de targhe coscì ghe n’é asæ! Anche chi a San Pê d’Ænn-a. Percöse, me son domandòu, un o dovieiva giâ co-ina targa foresta? Manco o tenpo de fame sta domanda chi, che a rispòsta a l’é sciortia comme ’n roggio d’ægoa quande se scciappa ’na canâ. Ma l’é ciæo: ’na targa foresta a consente de no pagâ de bolli, d’avei ’n’aseghiaçion foresta che no se sa quæ “aseghiaçioin” a te da, però a costa de meno. E pöi e bolette di cantonê. Preuva ’n pö a fâ pagâ ’n autovelox a un co-a targa, no françeize ò tedesca, ma da Romania, de l’Albania e via discorindo. Aloa cöse se fa? Beh, chi in Italia semmo asperti ciù che ’na vorpe: defæti o Codice da Stradda o l’inponn-e (òua, inponn-e, se fa pe dî) che ’na machina a deve avei ’na targa italiann-a dòppo ’n anno ch’a gia pe l’Italia, se no... ’na boletta da quattro palanche! Inte quarche atro comun an decizo che e machine co-a targa foresta van conscideræ de contrabando e van donque confiscæ. E chi a Zena cöse se fa?

O Crescentin

Pigiòu da-o Gazzettino Sampierdarenese Anno XLII - N. 6, 10 de lùggio do 2013