Sta chi a l’é da rie, s’a non fise da cianze! Saiâ che ogni giorno chi passa ne sciorte feua unn-a neuva, ma no se sa ciù cose pensâ. Oua pâ che ghe segge quarche rebello che, pe demoase ò perché o gh’à o çervello camoòu, o va ’n gio a dâ feugo a quello ch’o l’incontra pe-a stradda. O l’à visto i cascionetti da rumenta, quelli pe l’accugeita diferençiâ, dove ghe va misso o papê... ’N invito a nosse! O papê o bruxa ben, e quando o l’à finio de bruxâ, tocca a-o cascionetto ascì. E quello o l’é de plastica e o se deslengoa comme ’n gelato òu sô. Coscì li, in fondo da stradda Cantore, ’na matin de ’n pö de giorni fa gh’ea ’n motto gianco e neigro, bruxòu, che, bezeugna dî, l’Amiu (ma ghe chi dixe “Amîo”) a no l’é stæta goæi a amialo e inte quatr’e quatr’eutto a l’à cangiou con un bello neuvo... fin ch’o dua. Ma a sorpreiza a l’é stæta quand’ò ’ncontrou, in via Malfettani, da-a parte de via Rota, in camioncin, in frigon de quarche butegâ da mercoei, anche quello tutto bruxou. Ma inte sto caxo chi, se se ghe mette de mezo o Comun, o Municipio, i cantonê, o codice da stradda e chisà quæ atro papelitto legale, me sa che quello malocco de freciamme ruzenento sò-u tegnimmo pe ’n bello pö. Insomma, comme e machine abandonæ. Ma i foei no son solo chi. Comme se leze (veramente a mi me l’à dito mæ nevo) in sce l’Internette do Gazetin, pâ che sta legera chi o se dagghe da fâ anche inte di atri quartê de San Pê d’Ænn-a. Ma percose dâ di danni a-e gente e a-o Comun? Poscibile ch’o no gh’agge atra demoa pe stragiâ o seu tenpo veuo? Opure o veu dine quarcosa da seu sitoaçion... Saiâ, ma mi o lighieiva comme ’n salamme, o serieiva inte ’na casciaforte e cacieiva a ciave in mâ. Ma se sa: mi son in mogognon.

O Crescentin

Pigiòu da-o Gazzettino Sampierdarenese Anno XLII - N. 4, 30 de arvî do 2013