A pâ ’na föa, ma se gh’é ’na cösa ch’a fonçionn-a, sùbito te ghe métan e moen in çimma pe desfâla e mandâla in malôa. Ah sci, sci. A l’é propio coscì. Pigémose ’n pö comme co-i mezzi. L’é ciæo a tutti che giâ a çitæ in sce ’n òutobo a no l’é a ciù bella demôa. Quande poi o l’é pin no ti sæ mai comme stâ: se ti te metti de traverso ti t’arenbi a un, se ti te infricci tramezo a doe personn-e no t’ariesci ciù a tegnite. Insomma, in bello ciæto! Saiâ... ma se t’æ d’anâ ’n centro, da solo, e ti ghe devi stâ pe ’n pö, no l’é che ti peu spende dinæ a rêo pe tegnî a machina drent’a ’n posteggio. E aloa ti t’adatti a pigiâ ’n òutobo. E bezeugna ancon ringraçiâ che ghe son... Va ben: ghe son quande gh’en (de ræo a dî a veitæ, ma cöse s’à da fâ se a gîa inte quello moddo). Però, no se peu mogognâ de longo e no bezeugna genâse a dî che o “bigetto integròu”, treno + bus, o l’é ’na gran bella invençion. Ti monti in sce ’na coriera sotta câza teu, ti peu cangiâ e montâ in sciâ metro (dove a gh’é) e se t’arivi in staçion ti peu pigiâ o treno e tò-u li che inte ’n bagio de gallo ti væ da ’na parte a l’atra da çitæ, che no scodémosou, a l’é longa comme a famme. Dæto che o “bigetto integròu” o fonçionn-a ben, cose gh’é de megio che levalo d’inti pê? E coscì, pe decidde quarcosa, rionioin in Comun, in Region, ratelle, discuscioin, acapise mâ e risponde pezo... Insomma a-a fin de sto gran ramadan quæ a l’é a soluçion? Quella de eliminâ o “bigetto integròu” ò donca oumentâ de ’n spropòxito o seu costo. Ma sti scensiati do traspòrto, no poriescimo mandali in Pavian, ’na vòtta pe tutte?

O Crescentin

Pigiòu da-o Gazzettino Sampierdarenese Anno XLII - N. 1, 31 de zenâ do 2013