No stæmelo a dî viatri ascì che dexenbre o l’é o meize dove scazze o Dênâ (va ben, sciugabele! vò-u diggo in talian: Natale). Ah! Comme me saiva cao parlâ do pranso, do dinâ da noxe, de l’invexendo pe-e stradde! Ma st’anno chi ghe n’é unn-a ch’a no se peu taxei: sto meize chi ghe o “saldo dell’imu”! Za che a mi “imu” a me seunna comme ’na parolla do gatto... Sci, l’é vea, n’ò za parlòu a-a cheita, a zugno, quande gh’ea da pagâ a primma rata. Sci, ma oua o problema o l’é ben ben serio! Intanto, diggo mi, pagâ e tasce o no l’é mai in piaxei, specce poi pe niatri zeneixi, che inta Republica de tasce ne pagavimo poche pe ’n davei. Ma metemmo pure de rasegnase e de voei pagâla st’imu chi, tanto de de li no se scappa... Ma a pâ ’na foa! Gh’é mai tante de quelle dificoltæ che ghe veu ’n scensiato pe fâ i conti! Niatri, povei despiæ, ne pâ d’êse comme ’n polin inta stoppa! E za perché no basta fa o conto de quante devimo pagâ. No! Troppo façile! No, no. Bezeugna anche dî quante va a-o stato e quante a-o comun. E pò-u stato gh’é ’n codice, pò-u comun ’n atro, da çernili tra dexemilla! E poi, pò-u stato quota fissa, pò-u comun quota variabile. E a quota a cangia s’a l’é a primma caza, e a l’é diferente s’a nò-u l’é. Insomma: in pastisso do diao. Mi son afortunòu perché caze n’ò solo che unn-a. Ma pensæ ’n pö a quelli desgraçiæ che de caze n’àn abretio che diàscoa de giamin che devan fa pe pagâ! Diggo pagâ, miga scheuve! Mah... bezeugna ese pròpio di profesoî pe inventase ’na tascia ch’a mette ghignon e ch’a l’é coscì difiçile da pagâ! Saiö in mogognon, ma quande gh’ea a Republica...

O Crescentin

Pigiòu da-o Gazzettino Sampierdarenese Anno XLI - N. 11, 20 de dexénbre do 2012