Eh za che mò-u sentiva coâ zu dò-u nazo... Stanni a vedde, pensava da zoeno, che quande saiö vegio tutto sto ben de Dio che gh’é oua pe-i ançien manaman sucede che nò-u levan. A isa a isa riesciö a portame in caza ’na stissa de penscion, ma devo avardame ben de no amoutime! Sci scignor: a leze quello che scrive i giornali no gh’é goæi da stâ alegri. Defæti quande se parla de sanitæ a paròlla d’ordine a l’é: riorganizâ. Ma partindo da l’asesô pe ariva a mi, l’urtimo di scemelen, tutti semmo ben che riorganizâ veu dî fâ di taggi, serâ di uspiæ, levâ di serviççi, fâne pagâ o pronto socorso, e mêxìnn-e, i meghi, i specialisti, i ezammi. Ben chi m’afermo che intanto òu semmo tutti quæ o l’é o destin ch’o n’aspeta. Eben, cöse ghe posso fâ, mi che conto solo ’n voto a-e eleçioin regionali? Ninte! Posso solo ougurâme de no pigiâ de moutie, de sta senpre ben e, quande saiâ l’ôa, de dâghe in cianto li a-a spedia. Meschinetti quelli che poi gh’àn bezeugno de l’ospiçio. Saian quello che saian, i ospiççi, ma ancon d’asæ che gh’én. Però ancheu no gh’é manco ciù i dinæ pe tegnîli averti! O Manoælo Brignole co-e seu palanche do Seiçento o l’é stæto bon de costruî l’Abergo di Pövei: niatri ghe l’emmo missa tutta pe caciâlo zu. A Duchessa a l’à speizo ben ben di franchi pe tiâ sciù o San Rafaele. Niatri òu femmo falî inte ’n amen. Eh, meschinetto mai de mi, che veciaia me s’apresenta davanti!

O Crescentin

Pigiòu da-o Gazzettino Sampierdarenese Anno XLI - N. 8, 28 de seténbre do 2012