Æh sci! A zoentù d’ancheu a no l’é ciù comme quella de ’na vòtta! Cangia i tenpi e cangian senpre in pezo! Mah! Chisà dove s’aniâ a finî! A l’aiva pròpio raxon a Santa Brìgida quande, mentr’a pasava d’in scê colinn-e de Zena a diva: “Meschinetti tutti quelli che restiàn a vive i tenpi sensa önô ne gena!”. Æh sci! Ghe semmo! Che segge ciæo: bravi zoenòtti ghe n’é anche ancheu, s’intende. Goai se no fise coscì. Però, diggo a veitæ, tutte e vòtte che me sucede (de ræo, perché m’é cao stâmene a San Pê d’Ænn-a) de stracoâ a De Ferari... òscitoêse! Me se sccianca o cheu de vedde tutti quelli zoeni ch’en li asetæ, a tòrsio, a beive bira e a colâ panetti che coscì inciastran megio tutti i scæn de Paxo. Ma ti te l’inmaginn-i a demoa se ’n vegio comme mi o ghe scuggia, in sce quello lepego, e o te ghe piggia ’na cuâtâ pe-a tæra? Ma dov’en i cantonê? Za che quelli son solo boin a dâ de bolette a-i pövei sciafeur zeneixi (magara perché van comme di furgai in sciâ sorviaelevâ a-i 66 chilòmetri l’oa...). E i aministratoî? Tanti chén... ’n asidöro! O va scrito con l’apòstrofo! Tanti ch’én, divo, no ghe n’é mai un ch’o passe d’in Paxo? De spésso pöi, dæto che sti zoeni chi no san comme fâ a stragiâ o tenpo, ti-i senti cantâ, sunâ a chitara, sbragiâ e ratelâ scinn-a quæxi a dâse. E te va ancon ben se un di seu chen o no te mostra i denti. Ah bella zoentù! No t’ê ciù comme quella de ’na vòtta... e purtòppo anche i grendi, specce quelli che ne governan, no son ciù de quelli...

O Crescentin

Pigiòu da-o Gazzettino Sampierdarenese Anno XLI - N. 5, 31 de màzzo do 2012