No se ne peu de ciù! E basta con sto tenpo do... beretin! Bezeugna che sò-u dimmo ciæo: no semmo pe ninte pronti pò-u freido e pe-a neie. E aloa? Perché nisciun fâ ninte pe ascâdâ a çitæ e levâne da ’na sitoaçion che se giassa non se peu manco ciù caminâ? E sta vòtta chi pâ ch’a ne vadde de lusso. Eh za, perché gh’é freido, sci, ma o çê o l’é seren e a neie a no s’é fæta ancon vedde. Se donca te lascio dî! Primma ti sprofondi co-i pê inta neie fresca; e magara a quarche batozo ghe sâta i scrìpixi de tiâte ’na balla de neie ch’a te inciastra capòtto e capello. E machine devan mette e cadenn-e che però scardusan tutte e stradde che poi gh’é da spende ’n muggio di dinæ pe metile torna a pòsto. Dòp’in pö, quande a neie a se deslengoa, e stradde vegnan comme in pâtàn giasòu, ch’o l’é pezo da bratta perché o ghe mette ’na vitta pe levâse da mezo. Ben, sò-u ciù pezo o no l’é ancon arivòu, o mâ o l’é za chi. A gente a va ’n gîo ingiarmâ inte ’n mòddo... e ti-i veddi tutti abesîi dò-u freido... Ma stævene in caza a mangiâ da polenta! Saiâ. Ma de segûo se stemmo chi a-aspêtâ l’agiutto de chi sa chi semmo belli aroinæ. Manco boin a levâ da mezo ste perturbaçioin che ne pòrtan o freido... son solo boin a vegnî a çercâ i voti quande veuan fâse eleze. Ah, ma sta vòtta chi... ninte!

O Crescentin

Pigiòu da-o Gazzettino Sampierdarenese Anno XLI - N. 2, 29 de frevâ do 2012