Académia Ligùstica do Brénno

parlémmo a nòstra léngoa

Académia Ligùstica do Brénno
 
Intrâ > Mediatêca > Tèsti > 98.000.000.000 €

98.000.000.000 €

[ Tèsti ]

 
 

[ Dìnni a teu ]

Mediatêca

Màppa do scîto

Dôv'én i coménti

Covertìnn-a

 

Bâgia bàggio: l'ægoa coâ a l'à fæto i bageu; coscì, ànche pe stavòtta chi, gh'émmo mìsso 'na péssa. Segûo che stâ de lóngo inti fosoéi, che a rozâ a no riêsce a inpî, a no dêv'êse 'na demôa. E se dovésse mâi sucêde che càzze anche-e câze alôa saiêscimo pròpio aroinæ! Perché, a-amiâse bén in gîo, ti veddi i öchìn fiezâ 'n scê ónde do mâ e ti sénti a vôxe antîga do cheu ch'a te dîxe cianìn: «Poêse fâ cómme l'öchìn! Pe ògni ónda che arîva arsâme sénpre 'n pitìn!»

E ancheu l'ónda a se ciàmma "manêuvra", paròlla ch'a métte poîa perché vìntiçìnque miliàrdi de éori són pròppio tànti! E, a són de tagiâ, se tagjâ ànche e ràmme vèrdi e no sôlo quélle che no dàn ciù frûta bónn-a e scioî coloræ. Za se sénte a l'anàsto che sti tàggi chi fàn mesciâ quarcösa inte l'âia: sta cösa chi a no se poriâ ciù fâ; sto servìçio o saiâ redûto; ghe saiâ ciù tàsce locâli da pagâ. E pensâ che inta Repùblica de Zêna, inta rìcca Repùblica de Zêna indipendénte de tàsce quæxi no se ne pagâva...

«Vànni cianìn, cìao fræ. Mîa che ànche a-a giornâ d'ancheu ghe chi de tàsce pròpio o no ne pâga.» Da no crédde! Do doîmìllasètte l'é stæto acertòu 'n'evaxón de novantéutto miliàrdi de éori... «Cómme, cómme, cómme? Cös'a saiéiva sta cösa chi?»

O Secolo XIX do trentùn de màzzo do doîmìllasètte o l'à publicòu 'n'inchièsta do Ferruccio Sansa e do Marco Menduni dove l'é dimostròu che e socjêtæ concescionâie de "slot machine" àivan evâzo bén novantéutto miliàrdi de éori de tàsce. O trùcco o l'êa quéllo de destacâle da-a Ræ pe no fâ registrâ e zugâte e quìndi no pagâ de tàsce. Bén, s'è arivòu a evàdde tùtte quélle palanche li. No ghe crediéi, ma scìnn-a a ancheu (l'é za pasòu ciù de tréi ànni!) no l'é stæto pagòu mànco in cìtto d'éoro e pâ che o Stâto italiàn o no gh'àgge coæ de dâse da fâ pe fâ pagâ i evazoî.

«M'atàsto se ghe són» o dîva o Maninpàsta. E a són d'atastâse o l'à scovèrto ch'o no gh'êa. A són de lêze e lézze (pe çercâ de gjâghe in gîo) o l'êa sparîo cómme o scénto. Ma i novantéutto miliàrdi dôve són?

ALB
http://www.zeneize.net

Pigiòu da-o Gazzettino Sampierdarenese Anno XXXVIII - N. 7, 31 de lùggio do 2010

[ in çimma da pàgina ]

Dìnni a teu

Nomiâgio:
Stàggo a:
E-Mail:
O mæ scîto
Internet:
Coménto (no ciù de 1000 caràteri)

   

Nòtta: o coménto o saiâ publicòu, o ciù fîto poscìbile, dòppo ch'o l'é stæto controlòu.

[ in çimma da pàgina ]