Se l'é vêa chi-a strîa a xêua de contâ e pàgge che gh'é, làscia pûre che mi pàgge e pàgge do brûgo, che tànto no són bón a xoâ xêui vêui, sôlo boìn pe fâ di dànni. Dànni a ménte a mi: apénsiteghe! Se mi pàise 'n òmmo de pàize, un paizàn, pe dîl'æ cùrte, alôa sci che saviæ a chi sæ sæ cómme levâghe a sæ... Bêi, riæ, vivàgne, cómme pe dî ægoa a róggi, no màncan mâi inte fàsce e inte còste di mónti. Ma za m'abastiæ de savéi che se tùtti quélli ch'én chi, cómme chén da goàrdia, pàisan zenéixi a ûzo zenéize alôa quarcösa voriéiva dî che se méscia into cheu de tùtti. Za sæ alêgro de sperâ che se tùtti niâtri pàiscimo segûi che quarcösa se méscia, tùtti i âtri ascì inprendiéivan a fâse röso tra i mâpigiæ da léngoa e i despiæ da paròlla.

Apénsiteghe! Són i soìn do cheu chi-a són de dâghe (e dàghia!) ne pêuan portâ da-a pòrta indoâ de ’n sô ch'o lûxe co-ê nòstre pòule antîghe. E ancón reciòcan inte l'âia i discórsci de vêi: chi ghe vegnîva e famìgge... lazù crescéiva i armoìn... la 'nto pròu s'arubatâva i figeu... l'é arivòu e làlle da-a vìlla...

Apénsiteghe! Ancheu gh'émmo bén bén de ciù. Chi l'é ch'o no peu scrichî? Quæ zoêno o conósce in sciâ seu pélle cös'a l'é a bazìnna? Ancheu l'êuio o se pìggia-a giâre, o vìn a bótte, a càrne a mêze béstie, a fænn-a a sàcchi, e êuve a càsce, e forçìnn-e a chìlli, e camîxe a dozénn-e, i mandìlli abréutio. Ma, dìggo mi, sémmo pe quèsto ciù felîçi? E quànda-a gràscia a ne fa crésce a pànsa aniêmo a fâse levà'n mêtro de bêle?

Apénsiteghe! Ancheu che gh'émmo tùtto anémmo a réizego de pèrde a cösa ciù 'nportànte: e nòstre réixe! Che són e nòstre tradiçioìn, a nòstra stöia e, sorvetùtto, a nòstra antîga léngoa! Gh'é vosciûo mil'ànni pe fâ sccioî o zenéize de Portöia, de Sàn Pê d'Ænna, de Ôtri, d'Arbénga ò de Spézza. Poêmo permétise de pèrde tùtto in mêno de çént'ànni? Pe quésto bezéugna parlâ, parlâ e ancón parlâ a nòstra léngoa, mostrâla a-i fìggi e, pe-e tànte madonæ e pe-i tànti mesiâi chi-a conóscian, mostrâla a-i nêvi e a-e nesétte. Sôlo coscì poriêmo, tùtti insémme, arvî tórna a pòrta indoâ de 'n sô ch'o lûxe co-ê nòstre pòule antîghe.

ALB
http://www.zeneize.net

Pigiòu da-o Gazzettino Sampierdarenese Anno XXXVII - N. 2, 28 de frevâ do 2009