Siamo in un piccolo paese della Liguria in tempo di elezioni comunali. Si alternano ai microfoni per la relativa propaganda i candidati delle due liste in lizza denominate "do Sgobón" e "de l'Òrmézzo". È al microfono per primo un candidato della lista "de l'Òrmézzo"...

Scignôri, són da lìsta de l'Òrmézzo
e dónde gh'é do brùtto ghe netézzo,
pe quésto són con quélli che in progràmma
gh'àn scrîto: "Démmo feugo a l'érba gràmma!"
O pàize o veu di fæti e no paròlle
o veu di òmmi, e no de brâghe mòlle
a çèrte génte ghe sbragémmo: "Bàsta!
Pösæ li l'òsso, e vîa co-e màn d'in pàsta!"
Pe quésto invîto tùtti a fâ-atençión
de no votâ pe-a lìsta do Sgobón.
S'aviêmo quàlche fâto ch'o n'ascìste
vediéi de cöse che no l'éi mâi vìste,
se aministriêmo o pàize sénsa ostàcoli
noiâtri ve faiêmo di miràcoli!
Coràggio dónque, no pensæghe tànto,
votæ l'Òrmézzo e ve troviéi d'incànto.
Scignôri, mæ carìscimi eletôri
in lìsta gh'émmo outéntici valôri
decîzi de pigiâse o mâ de pànsa
pe risòlve i problêmi inta sostànsa.
Lotiêmo con inpègno e seriêtæ
agiutàndose tùtti cómme fræ,
e cómme risolviêmo sta questión
ve fàsso chi 'n ezénpio pe canpión:
metiêmo chi à bezéugno da 'na pàrte
pe-a prìmma spediçión ch'aniâ in sce Màrte,
e quélli ch'àn avûo pöca fortùnn-a
i fémmo anâ de völo sciù inta Lùnn-a
e finalménte sôli, liberæ
sénsa sentî ciù dî: " Se a sâ a sâ asæ"
fra niâtri benestànti e seu parénti
viviêmo in pâxe e sénpre ciù conténti,
a vìtta a saiâ tùtta 'na cocàgna
perché no se sentiâ mâi ciù 'na làgna,
e si-a pasiêmo bén, perdingolìnn-a,
fra génte ch'àn de lóngo a pànsa pìnn-a.
Scignôri, son da lìsta de l'Òrmézzo
e quéllo ch'ò promìsso no-o corézzo.
Se me dæ o vôto a mi ve garantìscio
che fàsso i mæ interèsci e pöi ghe strìscio,
e dìggo cómme dîva Plìnio o vêgio
quànd'o se fâva a bàrba sénsa spêgio:
"Pro domo mea", a-a fàccia do Sgobón,
e làscio o pòsto a quésto bacaión...

Attenzione, attenzione, viene ora al microfono il candidato della lista dello scopone...

Amîxi, són da lìsta do Sgobón
perciò veu dî che són 'n òmmo d'açión.
O progràmma de quésta nòstra lìsta
o l'é ciæo, lanpànte a prìmma vìsta,
e se riûscjêmo a òtegnî o Comùn
stavòtta no nò-u lêva ciù nisciùn.
In sìntezi ve véuggio in pö parlâ
de quéllo che noiâtri voêmo fâ.
Fondiêmo l'Agençîa di tapolétti
pe chi a-e carêghe à da incolâ i legnétti
ò in câza o gh'à de miâge da rascciâ
òpûre o lavandìn da destapâ
pe chi 'n sciô téito à da cangiâ de ciàppe
òpûre o l'à da dâ de l'êuio a-e màppe,
ò dónque a bascelæa ch'a no l'é fìssa
òpûre o gh'à o bronzìn ch'o pèrde a stìssa,
pe chi à di gàtti da portâl'a pèrde
ò in sâla o ghe veu dâ 'na màn de vèrde,
e in sce l'inségna scrîto ghe saiâ:
"Ognuno si rivolga ónde ghe pâ".
A-i contadìn che sàpan tùtto o giórno
daiêmo 'na bistécca con contórno,
a tùtte e dònne démmo in lavapiâti
e a-i ciù picìn i glicerofosfâti.
Faiêmo in gràn depòxito pe l'ægoa
e a chi l'é sénsa regaliêmo in pægoa.
I fóndi sciortiàn fêua de segûo
perché metiêmo a tàscia in sciô stranûo.
Infìn pe divertî a popolaçión
faiêmo in bèllo cànpo da balón
segûi do nòstro spìrito sportîvo
de chi no sciortiâ mâi 'n àrbitro vîvo.
L'é 'n vànto pe noiâtri êse mâvìsti
da-i nòstri velenôzi antagonìsti
ma e lôro smargiasâte pìnn-e d'îra
ne sèrvan pe tegnîghe in frésco a bîra.
E in ciù dêvi capî che i aversâi
àn coæ de no fâ nìnte, òua e mâi,
e s'arivésan liâtri a comandâ
vediêmo crésce l'èrba in sciô ciasâ.
Amîxi, votæ sôlo pò-u Sgobón,
quélli da lìsta àn tùtti o môro bón
e se votæ pe mi ve garantìscio
che pe çìnqu'ànni no saiö ciù mìscio.
Mi ve salûto e me ne vàddo a çénn-a
perché da-a fàmme ò scìnn-a o mâ de schénn-a.
Criæ fòrte insémme a mi: "Abàsso l'Òrmézzo!"
e òua l'aciànto li, se no chechézzo...