Tùtto quésto
perché a-a Maiétto
tréi figeu
gh'àn sponciòu o carétto.

Nón apénn-a ch'a l'é in fóndo
t'incoménsa o finimóndo
méntre a röba a ghe va in tæra
e i figeu fàn tùtto a-a sbæra,
e a te sbràggia: "Delinquénti,
farabùtti, malvivénti,
quésta qui me la pagâte
fàcce dûe da libeciâte
ah viveur da farinâte,
làppasùppe riscaldâte...",
ma vén zu 'n tòcco de grónda
che o carétto a te ghe sfónda,
méntre i rànghi fàn la riónda
lê a divénta furibónda
e a l'aciàppa a sciâ Giocónda
che l'é 'n giórno ch'a l'é biónda
e a ghe dîxe: "Mi v'amàsso!"
a 'n tranvài ghe scàppa o bràsso,
a 'n frugón ghe mòlla i frén,
òu maxìn ghe scàppa i chén,
a menèstra a s'inspesìsce,
a Maiétto a s'ingoersìsce
e a te dîxe: "Te salûo,
va a finî ch'arèsto òu scûo..."
E into méntre bàlla a pànsa
a l'inciâga tréi co-a bànsa
prìmma ströfa da romànza.

Sciòrte tréi d'inte 'n conìggio:
o Scavénn-a, o Çiòula, o Stìggio;
spónta o Ràppa, o Sùppa, o Sórdo,
o Barbòtto co-o Balórdo,
o Câsìnn-a, o Bóga, o Giàcca,
o Venéçia co-a Sàlacca,
o Bronchîte, o Tóssa, o Brîgoa,
o Verìnn-a insémme òu Grîgoa,
o Panélla, o Rànfa, o Sbàffa,
o Lumàssa, o Ségna, o Gàffa,
o Mizêia co-o Pastétta,
o Suménsa co-a Rasccétta,
a Mandrìlla, a Bacaiónn-a,
a Merlùssa, a Cichetónn-a,
a Potàssa, a Lérfe-sciòcche,
a Moriâgia, a Pèrdi-ciòcche,
o Radìccia co-o Sighìrri
che dò-u rîe fàn karakîri
fra 'n dilùvio de tomâte
za se fórma e baricâte.
"Micidial sarà la pugna!"
dîxe 'n mìscio ch'o l'à a rógna...

T'ìntra in scêna Bórgo, Mænn-a,
Meu, Portöia, Pré, Madænn-a,
se divìdde tùtti i rioìn
e incoménsa a xoâ lerfoìn,
câsci, trìppe, scopasoin,
diæ'nti éuggi, cöi, sponcioìn,
scàrpe vêge, cicaroìn,
carbonìggia, zétto, moìn,
tamarìndo, piæ, brignoìn,
cìcche, tròfie, macaroìn,
létti, scófie, beberoìn,
fornelétti, cónche, dràppi,
fiàschi, gòtti, tóndi, tàppi,
regolìçia, fenogétti,
bacalæ, sùcche, corzétti,
færi câdi, ciöi, lumétti,
tagiæn vèrdi, capelétti,
brocolâte, fónzi sécchi,
poén de câza, chifarétti,
gànbe, bràsse, nâzi, còlli,
téste dûe, colétti mòlli,
mocolòtti, trìcche-tràcche,
mû, camèlli, strùssi, vàcche,
scìmie, antìlopi, macàcchi,
gàtti bàrdi infiæ'nti sàcchi,
friscieu giâni, panisétte,
fiamanghìlle de trenétte,
bónb'a màn, mitraliatrîci,
bezagnìnn-e, stiratrîci,
murtæ, òbici, tratrîci,
becamòrti e levatrîci...
e into pìn de la torménta
pàssa o càmion da ruménta.

Tùtto quésto
perché a-a Maiétto
tréi figeu
gh'àn sponciòu o carétto.