Ballata triste, ballata amagunaa
pe'na çitæ ch'a cianze, sfurtynaa.
Sun ciy de 180 e fabbriche seræ
e ciminêe azmorte, i rastelli sprangæ
perché a speculasiun a l'ha senpre raxun
perché a speculasiun a l'ha senpre raxun.

U portu u l'é 'n malûa ma Rumma a làscia andâ
e u privòu u nu l'investe, u vœ sûlu guägnâ
e 'n cianŷa u va à spende quellu che à Zêna rende
e 'n cianŷa u va à spende quellu che à Zêna rende.

Pôi mústran che i tunêi créscian de lungu à rybbi
ma u l'é sûlu petrolliu ch'u passa drentu ai tybbi
e u va distante in tæra lasciàndune 'na gnæra
e u va distante in tæra lasciàndune 'na gnæra.

Ballata triste, ballata amagunaa
pe'na çitæ ch'a cianze, sfurtynaa.
E câze de ciymentu amygiæ cumme fen
inscii prufî ridenti e [...] d'i cen
che e culinn-e se scròllan ma che i ommi nu mòllan
che e culinn-e se scròllan ma che i ommi nu mòllan.

E cartêe sparîe, i téscili seræ
u mecannicu in tæra i cantieri gratæ
San Zorzu e Fossati ormâi "Bengôdi" d'âtri
San Zorzu e Fossati ormâi "Bengôdi" d'âtri.

Cuscí a "pedemuntann-a" cuê cyrve mastrysæ
e a Genova-Savunn-a in strazettu da bæ
l'Ourellia 'na bíscia che 'n pô d'ægua a scunpíscia
l'Ourellia 'na bíscia che 'n pô d'ægua a scunpíscia.

Ballata triste, ballata amagunaa
pe'na çitæ ch'a cianze, sfurtynaa.
Né possu dî "Che l'inse?", saiæ sûlu, duman,
à tiâ sta prîa ruvente ch'a me brŷxa int'e man,
à denunsiâ i trycchi de tanti nœvi "crycchi"
à denunsiâ i trycchi de tanti nœvi "crycchi".

Se à tîu, Zêna, ti vêgni, ti te sulêvi ancun,
cummi-ai tenpi d'i D'Ôia pe u tœ santu patrun,
"Pe San Zorzu, pe Zêna!" u sentiêmu zbragiâ!
"Pe San Zorzu, pe Zêna!" u sentiêmu zbragiâ!

Pe questu ancun mi cantu, pe questu arèstu chí
à dumandâ, mo-u sentu, vegnian senpre da ti.
Aspêtu sœnne l'ûa e guâi pei-âtri alûa!
Aspêtu sœnne l'ûa e guâi pei-âtri alûa!

Ballata triste, ballata amagunaa
pe'na çitæ ch'a cianze, sfurtynaa.