foto di Fabio Bussalino

Ciàn cianìn, cómme tùtti-i ànni, s’avixinémmo òu Natâle. E stræ comìnsan a inpîse de lûxe, i negòççi càregan e vedrìnn-e de decoraçioìn, e squæxi se fa fadîga a caminâ tramêzo a-i sciùmmi de génte che inóndan stræ, ciàsse e caróggi. Tùtti, però – chi ciù, chi mêno –, sémmo pìn d’axìllo, de coæ de stâ insémme e de festezâ. Chi l’è credénte se prepâra a celebrâ a nàscita do Sarvatô; chi no-o l’è o fa cóm’o l’eu, segóndo a seu coscénsa.

Gréndi e picìn se prepâran a-a fèsta. In figeu, in into Nòrd de l’Ouröpa, o decöra l’èrbo de Natâle insémme a-i genitôri; ’n âtro, a Nàpoli, o l’è tùtto indafaròu pe métte sciù o prezépio; ’n âtro ancón, òu câdo de l’estæ de l’América meridionâle, o no védde l’ôa de poéi stâ tùt’insémme in famìggia. ’N âtr’òtta ancón, alôa, l’ariviâ Natâle. Quànde, ànche st’ànno chi, scartiêmo i regàlli, saiêmo vixìn a-i nòstri câi e s’asetiêmo a mangiâ, no scordémose de chi òu móndo o no peu fâ âtretànto: i pövei, chi sta mâ, chi pe motîvi religiôzi o l’è persegoitòu e o no peu festezâ. No scordémose che Natâle veu dî che s’à da êse conténti do móndo pe fâlo vegnî ciù bèllo sénpre de ciù, no che dêmo pe fòrsa êse boìn pe fâ conténti-i âtri ò niâtri mæximi. No scordémose che niâtri festezémmo, ma bezéugna avéi rispètto ànche pe chi no crédde e sentî e seu raxoìn.

Alôa, o mê (làico) ougùrio ciù grànde o l’é che tùtti pòsan festezâ e gödîse de cheu quésta fèsta com’êuan, scibén che gh’è a crîxi e scibén che sémmo tùtti pìn d’inpégni. No scordémose che sémmo chi pe êse conténti e pe dâ ’na màn a chi n’à de bezéugno e l’è ciù ’n dificoltæ de niâtri: e tùtti, tùtti poêmo fâ quarcösa.

Bón Natâle a tùtti!

Stefano Lusito

Pigiòu da-o Gazzettino Sampierdarenese Anno XL - N. 11, 20 de dixénbre do 2011