Tùtto l’êa cominsòu quànd’êa-anæto òu cìrco. Quélla séia no ma-a poriö mâi ciù ascordâ: giocoliêri, domatoî de tîgri, mangiatoî de fêugo, pagiàssi e artìsti ’n scî gànpi. Da moîghe da l’emosción!

M’êa piâxûo coscì tànto che, tùt’asémme, m’êa vegnûo ’na coæ do poscito-êse pò-u cìrco e pò-u spetàcolo. M’asunâva mi ascì d’êse aclamòu dò-u pùblico e de vegnî invexendòu da ciocâte de màn abrétio. Vedéiva zò-u mê nómme in scê tùtti-i manifèsti, pe strâ, atacæ-a-e miâge: mi, o ciù grànde di artìsti!

No ghe-a fâva, àiva da preuâghe. Aviæ convìnto quélli da conpagnîa a mostrâme o mestê, pe diventâ mi ascì, in giórno, un de liâtri. Àiva za preuòu a-avixinâmeghe, dòppo i spetàcoli, ma no gh’êa stæto vèrso. Alôa l’êa o moménto de pasâ a-e fòrti: séiva ’ntròu dò-u tendón gròsso, sénsa fâme védde, e gh’aviéiva parlòu de persónn-a.

Intròu drénto (no sénsa dificoltæ) àiva sôlo che da çercâ i circénsi. ’Na paròlla! Cöse no gh’êa: costùmmi, nâzi de gómma, scàtoe, tùtto spantegòu li ’n gîo. Fæto i prìmmi pàssi tramêzo a tùtta quélla ruménta, ò sentîo ’n stratón a-a gànba e me so-âtreuòu co-o môro pe tæra. M’êa ’nganbòu ’nte ’n gànpo arenbòu sôvia a de scàtoe de cartón. Li drénto gh’êa de tùtto: màschere, dénti fìnti, crovâte de tùtti-i colôri. Gh’êa fìnn-a ’n gròsso fiôre: apénn-a tocòu, o l’àiva fæto schisâ ægoa da tùtte-e pàrte.

Segûo ch’a l’êa strâna. A ’n çèrto pónto me són stancòu: ónd’êan tùtti? Giòu ancón pe-in pö, ò treuòu l’intrâ de ’na stànsia picìnn-a, co-ìn cartéllo cón scrîto «Attenzione – Non entrare». Òh, pài de sci! L’êa coscì che m’oéivan tegnî fêua? Âtro!

So-intròu sénsa tànti regîi. De segûo no poéivan tegnîme fêua coscì façilménte. Tut’asémme, derê de mi, ò sentîo ’n vèrso de ’na béstia da fâ zeâ o sàngoe inte vénn-e. Me són giòu e me so-âtreuòu davànti ’na tìgre, i dénti in móstra e i éuggi fìssi ’n scî mê. In crîo da fâ vegnî zu tùtta-a baràcca e gànbe cómme no l’àiva mâi dêuviæ inta mê vìtta.

Âtro che cìrco, béstie e pagiàssi: de chi in avànti no véuggio mànco ciù védde ’n balonétto pe televixón!

Stefano Lusito

Pigiòu da-o Gazzettino Sampierdarenese Anno XL - N. 9, 31 de òtôbre do 2011