L’é ciæo cómme l’ægoa che conósce e savéi parlâ tànte léngoe, ancheu, se no ’n dovéi, o l’é ’n bèllo vantàggio pe chi l’é bón. Éuggio dî, inte l’êra da comunicaçión globâle (e anco-âsæ ch’a gh’é) saiéiva ’n pö tròppo òtimìsta voéi sperâ de scavâsela ’n gîo pò-u móndo savéndo parlâ sôlo che a pròpia léngoa moæ (ch’apeu quéllo da léngoa o saiéiva sôlo-o prìmmo di problêmi, dónca…). Ma se gjâ pò-u móndo o ne piâxe, ne vâ de segûo a pénn-a. Prezénpio: inte ògni pàize gh’é tànte bèlle cöse da védde, ma no se ghe peu lasciâ scapâ, spécce se s’é di intenditoî, a cuxìnn-a. Anæ’n pò’n Frànsa a domandâ un plat de viande ¹, ò, se no séi génte che se schìnfia pe nìnte, des escargots ²: no arestiéi delûxi (s’apeu co-â viande ve gùsta a pàsta ascì, ve làscio dî...). A ògni mòddo, pe caitæ, se peu ànche voéi anâ da âtre pàrte: tùtto se peu fâ, bàsta savéi desbelinâse. Ma, se voéi fâ ànche bélla figûa, mi ve consegiéiva de métive ’n bócca dötræ patàtte: che no ségge mâi de treuâse a dovéi giasciâ ’na frâze cómme «I went to the exhibition, but I didn’t appreciate much the swedish pictures» ³ séns’êse preparæ! ’Sómma, giùsto pe dâve ’n’idea a cöse poriêsci anà’ncóntra. Ma mi za me ne staiéiva de poéi saluâ tùtti de chi e de sa, anàndo a-a mænn-a ò inte ’n muzêo d’êuvie antîghe (a segónda di gùsti), co-in bèllo kalimera se olus ⁴, e magâra savéi cös’eu dî ascì. Ma mâi, mâi ò avûo tànta ràggia cómme quélla vòtta che ’n tìçio o m’é vegnûo a domandâ dónde se encontrara el aparcamiento gratuito más cercano ⁵. Che scciupón de fótta! No pénso d’êsime mâi sciâtòu tànto! Ò, armêno, no cómme quélla vòtta che me so-âtreuòu inta cascétta da pòsta in volantìn cón scrîto, a létie gréndi e ciæe, «Bonvolu aĉeti niajn citronpremilojn!» ⁶. Ma pe chi diàscoa m’àivan pigiòu, pe ’n bolibæ? Chi êan quélle legêre? E cös’oéivan da mîe? A pâ strâna, ma l’é stæto coscì, sine cunctatione ⁷, ch’ò decîzo de métime a inprénde quàrch’âtra léngoa mi ascì. E coscì, dòppo avéi preuòu de tùtto, són finarménte prónto pe-a sfìdda ciù grànde: gjâ pe Zêna e parlâ zenéize. Òua gh’ò sôlo de bezéugno d’un ch’o me stànpe i volantìn.

Stefano Lusito
http://www.tuttozena.org

¹ In piâto de càrne (fr.).
² De lumàsse (fr.).
³ Són anæto a-a móstra, ma no m’é piâxûo goæi i quàddri svedéixi (ingl.).
⁴ Bongiórno a tùtti (gr.).
⁵ Dôv’o se trovésse o parchéggio gratoîo ciù vixìn (sp.).
⁶ Acatæ i nòstri spremiagrùmmi! (esperanto).
⁷ Sénsa ezitaçión (lat.).

Pigiòu da-o Gazzettino Sampierdarenese Anno XXXVIII - N. 5, 31 de màzzo do 2010