Stæ câda sta chi, pe gnâtri apascionæ de léngoe minoritâie - pe-i motîvi che bén saviéi -, ma gh’é da dî che fòscia gnâtri zenéixi, pe ’n’òtta, doriêscim’êse i prìmmi a recilâse. E dichiaraçioìn di polìtichi ch’êuan tutelâ e nòstr’antîghe parlæ àn fæto bén bén do sciâto, ségge in scî giornâli, de lónga-aprêuo a çercâ de notìçie interesànte, e sorviatùtto ’n sce Internétte. Blògghi, spàççi de discusción, tùtti intazæ da-i cómenti de génte ch’êuan dî a seu in scî ùrtimi fæti d’atoalitæ. E zu pòule: gh’é chi s’apénsa che parlà’n dialétto a-i figeu (ò parlâlo e bàsta) ségge da sgréuzzi vilén e chi dîxe che, pe cóntra, bezoriæ parlâ de lóngo inte nòstre léngoe pe no pèrde e nòstre réixe colturâle. Ma méntre gnâtri sém’aprêuo a scanâse, dìndose de tùtto e de ciù, quarchedùn o l’à sentîo cöse dîxe i zoêni (che, tra l’âtro, so-ê persónn-e ’nteresæ da ste nêuve lézze che s’öriéiva introdûe)? A ciù pàrta-a dîxe che no sèrve a ’n bèllo nìnte, ma fòscia mànco liâtri sàn ciù quéllo ch’êuan. E pövei, alôa, sti zoêni, bernisæ da sta socjêtæ che, quànd’a l’eu fâ quarcösa pe bén, a gh’é da mâi tànti de quélli córpi, pêzo che de schincæ (no én ciù i ténpi de ’na vòtta, quànde no gh’oéiva goêi p’anâ a convìnse i zoêni!); ò dónque e-i làscia anâ-a scugiâ ’n sciô lépego de l’invexéndo, e sémmo bén, peu, cómm’a va-a finî. Ma fòscia òua quarcösa-a l’é aprêuo a cangiâ. Fòscia, gnâtri che parlémmo ’n zenéize, no vegniêmo ciù conscideræ di menoéi de pêgoe (pe chi ancón òu pensésse), ma sôlo di scemelén che pàrlan inte ’na léngoa "strana ed incomprensibile", patrimògno di ùrtimi vegétti derê a zug-æ càrte, co-o seu bàcco arenbòu a-e carêghe sórvi-æ quæ so-âsetæ. Cöse dî: bezéugna acontentâs-âscîe.

Stefano Lusito
http://www.tuttozena.org

Pigiòu da-o Gazzettino Sampierdarenese Anno XXXVII - N. 7, 30 de seténbre do 2009