Ancheu, inte sti ténpi abigoêlæ d'invexéndo e asbrîo, pâ che séggimo tùtti ròuxi, co-o mogógno 'n sce lèrfe, arensenîi da ‘na socjêtæ che, no poriéi dî de no, émm'ösciûo gnâtri ascì. Ne gîa de lóngo e bêle, pe 'na raxón ò pe l'âtra, ségge che se tràtte di préixi isæ da l'inflaçión che do fùmme néigro ch’o n'ìnpe i pormoìn. Ma goâi a dîlo, mêgio fâse 'na pisàggia e lasciâ pèrde, manimàn... De refolâse, ànche sôlo che 'nte 'n cànto (pe quéllo pöco ch'abàsta pe pigiâse 'n pö de sciòu), no ghe n'émmo o ténpo, e fòscia mànca-a coæ. E alôa arestémmo chi a marçî cóma-a móffa e a gjâ cómme di moscìn, a-a riçèrca de mêgoìn che ne pòssan agiutâ, ma che tànto no aniàn mâi bén. Gh'eu d'âtre meixìnn-e (ma quæ no se sa).

Voêmo cöse che no sèrvan (ò che són mêno necesâie), e a-i-âtre, che magâra n'amàncan ascì, no ghe pensémmo mànco. Sémmo òcupæ dò-u travàggio (mò-u giamìn, scibén che nò-u sémmo, perché no l'émmo visciûo, o l'é bén âtro), mêgio lasciâ f-æ cöse a chi se n'inténde: peu gnâtri, magâra, ghe daiêmo 'n'eugiâ, ma squæxi d'arescôzo, pe no poéi apeu mangiâsene de repentîo. E apeu mogognémmo, e se tórna tórna 'nderê. A l'é 'na rêua.

Quéllo che no capimmo, perché no-oêmo acapîlo (ò perché no gh'arivémmo), l'é che sémmo gnâtri a poéi cangi-æ cöse! Gh'eu sôlo da bónn-a voentæ, paçiénsa e savéi aspêtâ; dónque o mogógno sò-u meritémmo, cón tùtto quéllo che ne vêgn'aprêuo. Pensémmo 'n pö se no l'é l'ôa de cominsâ a fâ i sérri e mogognâ pe quarcösa ch'o l'aniéiva cangiòu pe 'n davéi, a ûzo zenéize. E se pròpio no ghi-â fæ, scialæve òu penscêo che, inta Repùbrica de Zêna, i bonægia, che s'inbarcàvan in scê nâe, àivan da pagâ pe poéi mogognâ quànde e cóm'oéivan. Alêgri!

Stefano Lusito
http://www.tuttozena.org

Pigiòu da-o Gazzettino Sampierdarenese Anno XXXVII - N. 6, 30 de zùgno do 2009